عید موارکا (شعر مازندرانی )

عید موارک 

همن ره مشته تی تی ،  عید موارک

تمومه  چله   سردی ،   عید موارک  

خونش خـونه داره سر  مست  بلبل

بنفشه کنده  تالـی  ،  عـید  موارک 

ورق  بزو  فلــک ،  شه  کهنه سـاله

شروعــه   سال اتی ، عید مـوارک 

دهون ره خنده مشت و تازه پندیک

دباره  نو  و  گردی ،  عیـد  موارک 

بهــاره دل چه شاده  ، فصــل کاره

دباره اونجــه  بتی ، عید  مــوارک 

هلی دار  هم  عاروس  بیه ،  دیاری

قشنگ  و اسبه چـتری ، عید موارک 

دیاری کوه و صـحرا ، سبز و رنگی

گلابه ،  مشته  عطـری ،  عید موارک 

خنه ره  سفــره سـوهه  ،  هفتا سینه

کچیکون  اونجه تالی  ، عید مـوارک 

شلــوغه دور سفره گــد و کچیک

چنده   کنه   خشحالی  ، عید موارک 

وچونه گس دگیته ، پول و عیــدی

بونه  مشت جیف خالی ، عید موارک 

موارک باشه امسال عیــــــد نوروز

بونه پر خنه خالی ، عیـــــد موارک 

***

میر حمزه طاهری هریکنده ای نوپا