X
تبلیغات
رایتل

ای چی بوم از ننا و گد ببا ، هچی گمه مه شعر تموم نهونه ...

دوشنبه 15 اردیبهشت‌ماه سال 1393 ساعت 10:26 ق.ظ
http://s5.picofile.com/file/8122251934/images2.jpeg

 

ای چی بـوم از ننا و گد ببا ، هچی گمبه مه شعر تموم نهونه...


 

ای چـی بــــوم از ننا و گـــــــد ببا

هچی گمبه مــه شعر تمــوم نهـونه

ای چی بوم اون صلح و صفای سه

خـــدا وری ، مـه شعر تموم نهونه


 

یاد بیارین ، بشکسه عصــا ره که

هنــوز وشونــه دسه بــــــوره دنه

کهنه قوا ره نــدونــدی چـــی بیه؟

هنتا مه دل همـــــون روزاره ونه

ای چـی بــوم کهنه قوا طاقچه سر

هـچی گمبه مـه شعر تمـوم نهونه


 

 

کجه بورده کرسی ی دور جم بین

قصه گتـــه گــــــد ببا همـه ی سه

کجه بورده اون سختـی ها که گته

چشه اصلـــی همتــی کلسه ی سه

ای چی بوم اون چشه اصلی ی سه

هـچی گمبه مـه شعر تمــوم نهونه


 

گلی سره پوستخ و کــوب و نمـــد

اوج و سبوس رواقه سر سر به سر

افتــــوی او نالــــه سر و مشته او

خنه گلــــــی داشتنه و چاچ به سر

ای چـی بوم سختی نداشتی ی سه

هـچی گمبه مـه شعر تمــوم نهونه

 

کو؟ چی بیه ؟ چلــوسر بچـــــا  او

پوس و رسن او گیشتنه سـره پیش

کمـر دلا لـب لبــی ره چـــــی بیه؟

رخ شسنه چک چکی اونجه هنیش

ای چی بوم  بچـــا اوی چلـــــوسه

هـچی گمبه مـه شعر تمـــوم نهونه

 

کجه بـــورده داز و فکـــا و بلـــــو

تــور و تاشه هنـــه لـــوره چی بیه

کجه بــورده زنبیل و سارخــه نون

تیسابه ، بــور و بــروره چـــی بیه

ای چی بـــوم تلی و پـــزغـــاله سه

هـچی گمبه مـه شعر تمــــوم نهونه

 

کجه بورده گــو و کلـــوم و اوخار

شیر دوشتنه صـــواحی و نمــاشته

کجه بورده کمـــل کـــوفا رج دچی

هـر اتا گوگزا اونجــه اسمی داشته

ای چی بوم شیر و دوغ و ماسه سه

هـچی گمبه مـه شعر تمـــوم نهونه

 

کجـــه بــورده کلــــه سر مشته دی

پوف که زونه چش همتی اصلی امو

دزنـــــونه سر لــوه دیــه گــــل بزه

هر ور شینه  ای دی همون ور امو

ای چی بــــــــوم کلـــــه سر پلاسه

هـچی گمبه مـه شعر تمـــوم نهونه

  

کجــه بــورده لالایی نصفــــه شو

گــره ی بن هنیش بینه خـــــو بله

کجــه بــورده فنر و لمپــــــای سو

کرسی ی بن نــوج زونـه تیم وکله

ای چی بــوم تاریکی ی شوی سه

هـچی گمبه مـه شعر تمــوم نهونه

 

ککلی داشتنه کـــــرک و چینکــــا

غــــذا وشـــونه سه ، دنیم و چفـــا

خیس دانه نـــــون و سبوسه ککلی

هلیک هلیک تن امـــونه ای سیکا

ای چی بــوم ککلی و کــــرکه سه

هـچی گمبه مـه شعر تمــوم نهونه

 

کو؟ کجه بورده گــو و پشته ازال

را گتنـه ورزه کلــــــه میـــــــونه

خسگــی ی دشته کنـــاره نـــــدی

اون زمـــونا هیچ کسه یـاد نشونه

ای چی بوم اون چو و ازالـــه سه

هـچی گمبه مـه شعر تمـوم نهونه

 

کجه بورده شو نیشت و مهمون داری

چایـی و بشته زیکــه  با ، چـــی بیه؟

کنس و خــــرمانی ، چــــن تا پرتقال

قصه و خنده ریکــــه با ، چـــی بیه؟

ای چی بوم اون مـوقـع ی شو نیشته

هـچی گمبه مـه شعر تمــــــوم نهونه

 

کجه بــورده لینگه کلـــوشه بـــدوت

کجــه بــــورده لبــــــاسه پینه بــــزه

کو ؟ کجه بـورده اون همه خاطرات

کجه بــورده دسا لینگ پینـــــه بزه

ای چـی بــــوم ننا و گـــــــدبای سه

هـچی گمبه مـه شعر تمـــــوم نهونه

 

شهر شینه بی ماشین و اسب و گاری

هیمـه دوش و تیل تنگـــه بینه راهــی

شـــو بیهــه وچون کــــــردنه راداری

تــرسینه لـــــرزینه همش تینـــــاری

ای چــی بــوم خسگی ی راهـــه سه

هـچی گمبه مـه شعر تمـــــوم نهونه

 

کایر شینه دشت و لت و لتکـــا سر

بیکــار بینه جـــم بینه شه کلک سر

خلاصه خار بینه همـــه اون روزا

اشناسینه همـــــــــدیگره ملــــه سر

ای چی بوم اون همه همـکاری سه

هـچی گمبه مـه شعر تمـــوم نهونه

 

بیین همـه یاد بیـــاریــم اون روزا

هچی دارمـی وشــونه اهـــدایی یه

نلیم بسازن کـــاخ و ویـــلا محـــل

یــادگـــــاری ننـا و گـــد بـــایی یه

ای چی بــوم شه شعر نـوپایی سه

هچی گمبه مه شعر تمــــوم نهونه


***

میر حمزه طاهری هریکنده ای نوپا

 

del.icio.us  digg  newsvine  furl  Y!  smarking  segnalo