چپون ... (تقدیم به همه چپونای ایران زمین)

چپون ...

صواحی گسفن همرا شـونه ، چپون

گـد گـده کــوره بـالا شــونه ، چپون

هـــوا ســـرده بچـــاهی تن هـداهه

دپیت وشال و کـــلا شــونه ، چپون

دیـــاره اسبـه سارخ دسه چــــو تن

دوسی نــون و پــلا شـــونه ، چپون

  

چمــر بیته ملـــه چپـــــونه ونگـه

ای دیمـه کـوه و صحرا شونه ، چپون

وره ره نــاز دنـــه شه کشه دارنــه

قـــدم رج زنـده ، ها ها شـونه چپون

نمـــاز خـــونه وه اون راسی تیناری

قبله ور ، دس به دعا شــونه ، چپون

خسه بیه ، تـو بیته ، تـن نخـــــاره

لب لبی دسه چـو جا شـونه ، چپون

للـه زنده چپـــــــون اشدونده بیشه

گلـی مس و نفس جا شـــونه ، چپون

نماشــونه ، بمــو چپـــــون دیــاره

خسه بیه ، ای فـــردا شــونه ، چپون

طاهـری شعــر بساز ، چپونــه درده

بدونن دیمه صحــرا شــونه  ، چپون

***

میر حمزه طاهری هریکنده ای نوپا