گلچینی از دوبیتی های بهاری ...

چند نمونه از دوبیتی های مازندرانی (تبری) تقدیم به تمومه مازرونی های عزیز ،

بئین همه باهم دعا هکنیم که امسال سال خش و پربرکتی ره داریم و مریضای وسه هم دعا هکنیم. شمه فدا

بهار ماه بمو ...

چِمِـر بَیته هِمِــن با شه بِهــاری

دَپـوشیهه شِه تَن سبز قِـــــوایی

سِلوم بِتِه تی تی رِه دشت و صحرا

عَجِب بیه قِشِنگ تا چِش دیــاری

***

  

ویشه با بهار ...

ویشه با نوروز سلطون بک و بو  بیته چه جور

گوشه گوشه با بهارماه رنگ و رو بیته چه جور

سبزه  ریگ  دارنه دهون ، با  ونوشه  ککی مار

جان خدای  دور  بگردم  ، البسو  بیته چه جور

***

هلی دار اسبه پوش بهییه ...

هلـی داره تـن اسبه پوش بهییه

زمین و صحـرا سبزه روش بهییه

ونـوشه اینجـه اونجـه بیه بیشار

قشنگی ویشه گوش تا گوش بهییه

***

ونوشه بیدار بیه ...

ونوشه با بهار بیشار بهییه

ککیمار لمه تن سوار بهییه

هلی دار اسبه پیرن تن دکرده

سبزه ذوخ کنده که بهار بهییه

***

بهار درنه ...

لمه ور ککیمار منزل هکرده

مسه بلبل صداره ول هکرده

بهار بمو ونوشه کنده تالی

همن شه لالوته کامل هکرده

***

به یاد لباس نو و نو پندیک ...

نو لباس تن شیهه دس گیته پندیک

خنه سر مراشنه گنه تبریک

ته جا اینه عروسی ور دپوشی

خشالی اونجه راسی زومه من ریک

***

میر حمزه طاهری هریکنده ای نوپا