یلدای شو

یلدای شو ...

ته گنی یلــــدا شــو ، مـن گمبه چلـــه

ته مطلب کنـدی رو ، من گمبه چلـــه

ته فــالــه حـافظـــه وا کنــدی امشـــو

من هـم طـالب امیری ره کمبــــه رو

 

ته گنی سفره سر شیرنی جورواجور

مه سفره پشته زیک رجـه دورتادور

ته گنـی اینتا آهنـگ خلــــــه خــاره

من هــم خـــونـدمه طـــالب طالباره

درازه چلــه شــو ، لا کمبه سفــــره

شب چـره خردنی ، وا کمبه سفــره

الامتــه شــــو چشـــه خـــــو دنیهه

تینـاری امشـــو ســـره ســـو دنیهه

بی حـواسی صداره ره سـر هدامه

کتـاب و قصـه ره شـــه ور هدامه

گت چلـه ی شوهه ، خش بمـوهی

سفره سر مشته سوهه ، خش بموهه

دوره ور شب چــره مشته میــونه

انــار و پشتـه زیک و بهــــودونه

سمشکه دست دلـه تیم تیم غــذاهه

تک و دس مشغوله تخ تخ صداهه

ولیک و خرمانی ، کنس و حـلوا

کمـــــاجـی نون میــونه هسه پیدا

همه جا جشنه چلـــه شو به راهه

دوره هـم دیِن امشــو باصفـــاهه

الهــــی هیچ دلـــی ناخش نــواشه

خشـی امشـــو همــــه وسه دواشه

ته گنی یلـدا شـو ، مـن گمبه چلــه

ته مطلب کنـدی رو ، من گمبه چلـه

***

میر حمزه طاهری هریکنده ای نوپا