مشتی ... (شعر مازندرانی )

مشتی ...

قشنگه خــوشه ره نــاز کنده ، مشتی

اتــا تیمه دهــــون گــاز کـنده ، مشتی

شه بینجــه تـــاشنه ، تک  مشته خنده

گلـــی خش دیمبه آواز کنده ، مشتی

هـــــدار کـنده شه دشته ور همــیشه

کپ و صحبت ورهمباز کـنده ، مشتی

 

افتـــاب بمــو بالا وشنــاهـــه خــسه

دپیتـه ســارخــــه واز کنده ، مشتی

دیـــاری هــی نفــس زنـــده تیناری

همش کار بیل و گرواز کنده ، مشتی

اذانــه ، چــاشگـــدر درگیرنه وضو

خـــداور قبلــه نمـــاز کنده ، مشتی

نمــاشـــونه ، دشـــــونه  ،خسه بیه

قوا دوش و عصا داز کنده ، مشتی

خنه کار و کلــوم و گــوی سروقت

ککلی ور سیکا ، غاز کنده ، مشتی

وارش دیته هـــــوا چش خو نشونه

اتی کوریک ، اتی واز کنده ، مشتی

گنه مشتی پائیزما شــومبه مشهــــد

شه دله اونجه سه ساز کنده ، مشتی

اره مشتی وه صحـــراره قـــــراره

تلاش ، صبح تا پینماز کنده ، مشتی

دراینه خسه تـن ، بینج مشته باره

وه امبس ول و ویــاز کنده ، مشتی

پائیز بمـــو زیـــارت شــونه مشتی

خشاله ، شـونه پرواز کنده ، مشتی

بساته طاهـــری شعــرهم ونـه سه

همه چی ره شه دل راز کنده ، مشتی

***

میر حمزه طاهری هریکنده ای نوپا